Приштина, 25.јули 2015 (ИНПРЕС) – Најголемиот број граѓани на Косово на претседателските избори би гласале за челникот на Демократската партија на Косово и поранешен премиер, Хашим Тачи кој сега е министер за надворешни работи, покажува истражувањето на Демократскиот институт на Косово.

Истражувањето на јавното мнение на Косово, спроведено во периодот од 26-ти јуни до 7-ми јули, покажува дека речиси третина, односно 29,6 отсто од косовските гласачи би го избрале за шеф на државата Хашим Тачи. На второ место е поранешниот лидер на движењето Самоопределување, Албин Курти, кој доколку изборите би се одржале сега би освоил 17,1 отсто од гласовите, додека трет е челникот на Алијансата за иднина на Косово, Рамуш Харадинај, за кого би гласеле 10,6 отсто од избирачите.

Свој фаворите за претседател на Косово немаат 9,8 отсто од испитаниците, додека 6,9 отсто би сакале претседател да стане некој кој не е присутен на тамошната политичка сцена. Актуелната косовска претседателка Атифете Јахјага, според резултатите од споменатата анкета, би ја поддржале малкумина, само 2 отсто.

На прашањето за начинот на изборот на претседател, 89,7 отсто испитаници рекле дека би било најдобро шефот на државата да биде избиран непосредно на гласање, а не како досега да го гласа парламентот. За сегашната практика на избор на претседателот се изјасниле 10,3 отсто.

Доколку претседателот биде избиран со директно гласање на избирачите, 84,8 отсто од испитаниците рекле дека ќе излезат на гласање, а 10,9 отсто не знае дали би гласале, додека 4,3 проценти не би гласеле.(Крај)

извор:Макфакс фото:архива