Охрид, 21. октомври 2025 (ИНПРЕС) – Во охридскиот Центар за јавно здравје тече бесплатната вакцинација против сезонски грип за ризичните групи граѓани, а интересот е голем.
Специјалист епидемиолог д-р Јованка Стурлакова Коровешоска за Супер радио и ОhridPress информира дека дневно на список за вакцинација има и до 400 лица, генерално се придржуваат на терминот и не се создаваат гужви. Досега се имунизирани околу 800 лица.
– Интересот е голем и нема гужва, лицата се придржуваат на терминот и оди многу брзо. Термините се на секои 10 минути. За Охрид имаме 2.000 дози, Струга 1.000 и за Дебар 300 и сите доаѓаат во Центар за јавно здравје, вели д-р Стурлакова Коровешоска.
Бесплатната вакцина е наменета за ризичните групи граѓани лица постари од 65 години, лица со хронични заболувања, здравствени работници, бремени жени и деца на возраст од 6 месеци до 5 години. Вакцината е висококвалитетна, четиритипна, а производител е Abbot biological од Холандија.
Покрај бесплатната вакцинација во Центарот за јавно здравје Охрид ќе се врши и комерцијална. Вакцините сѐ уште не се пристигнати, а предвидени се 100 дози од кои 50 за Охрид, 30 за Струга и 20 за Дебар. Цената ќе биде 700 денари, а за примање не е потребно претходно закажување.
Вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход особено кај ризичните групи. (Крај)
извор: ИнПрес фото: ИнПрес/архива
