Охрид, 16. април 2025 (ИНПРЕС) – „Композиторите од Охридскиот регион – историја, наследство и влијание“ е најновата книга на познатите и етаблирани охридски музичари д-р Гоце Џуклески и м-р Наумче Џуклески.
Книгата е пишувана десетина месеци, притоа е истражувано во соодветни институции, а е анализирана и литература, блиска на темата. Опфатени се повеќе од 30 композитори од сите музички жанрови.
Еден од авторите, д-р Гоце Џуклески во изјава за Супер радио и InPress истакна дека монографијата, напишана на многу лесен и разбирлив јазик, содржи информации, поврзани со музичкиот живот на композиторите, нивното творештво, соработките со уметници вокални солисти, музички групи, концерти, фестивали и слично. Потенцира дека со ова дело сакале да им оддадат благодарност за нивниот придонес.
– Во оваа книга насликана со многу љубов и почит, ги истражуваме животите и делата на поголемиот дел од композиторите кои оставиле и оставаат неизбришливи траги во македонската музика и пошироко. Со овој проект сакавме да го доловиме духот на Охридскиот регион, кој секој композитор од овој регион го имал во својата музика, особено од втората половина на 19 век па сѐ до денес. И ние авторите на оваа книга сме дел од тие композитори.
Овие композитори ги создале своите дела не само како уметнички изрази, туку и како одраз на заедничката историја, душата на овој народ, неговата борба и сл, вели Џуклески.
Охрид е песна, и тоа песна што се пее од срце, душа и историја, овде, музиката се раѓа како бран на езерото, потенцира Џуклески, а композиторите ја формирале музичката сцена на овој регион и го збогатиле културното наследство на Република Македонија. (Крај)
извор: ИнПрес фото: архива
