Охрид, 4. септември 2025 (ИНПРЕС) – Од препознатливиот симбол на градот Охрид, Билјанините извори, и понатаму не истекува вода.

Истото доаѓа по долгиот и сушен период со исклучително високи температури и скоро без врнежи од дожд. Во исто време водостојот на Охридското Езеро и понатаму е под просекот за овој период од годината.
Локалитетот „Билјанини извори“ охриѓани често го нарекуваат и душата на градот. Бројни посетители, домашни и странски се определуваат токму за посета на изворите, а локалитетот е една од најголемите препознатливости на древниот град под Самуиловата тврдина. Ова место го користат за да пешачат и да се релаксираат, како и да избегаат од гужвата која владее во центарот на градот.

Чистата вода со која се „храни“ Охридското Езеро, главно доаѓа од карстните терени на околните планини. Најголем дел од водата доаѓа од повисокото – Преспанско Езеро и преку подземни пукнатини низ планината Галичица, избива на повеќе места во вид на силни извори – врутоци покрај источниот брег.

Според денешните мерења на Управата за хидрометеоролошки работи на Република Македонија (УХМР) нивото на водата во езерото е на кота од 693,21 м.н.в што е за 13 сантиметри под просекот за овој месец (693,34 м.н.в) и 11 сантиметри над минимално дозволената кота (693,10 м.н.в).
Подолг период наназад езерскиот водостој е под просечно утврдениот. Отсуството на врнежи и високите температури и во деновите што претстојат се очекува дополнително да го намалат нивото. (Крај)

извор: ИнПрес фото: ИнПрес