Охрид, 23. јули 2025 (ИНПРЕС) – Деновиве течат активности за санирање и чистење на фонтаната „Четирите рајски реки: Гион, Фисон, Тигар и Еуфрат“ на плоштадот кај некогашниот „Мини Маркет“, веднаш до музичкото училиште „Методи Патче“.
Иницијативата за нејзино чистење е на академскот сликар, реставратор и конзерватор од Охрид, Никола Упевче, кој воедно е и автор на мозаикот.
Во изјава за Супер радио и InPress вели му било жал да ја гледа така фонтаната, со алги и влага, што остава неубава слика како врз него како автор, така и на бројните гости и посетители што ја виделе. Побара поактивен пристап и редовно одржување од страна на локалните власти.
– Ги исчистив мозаиците бидејќи беа со влага, со алги, тоа треба почесто да се одржува и да се најде начин, дали општината, дали локалните претпријатија, сепак е фонтана со вода, да земат малку проактивен пристап и да го средат тоа. Ми беше жал да го гледам така, оставаше неубава слика, прво на мене како автор и на сите гости што го виделе, до мене дојода и реакции. А тоа е многу убаво катче, полно со луѓе, доста посетено и пријатно. И самата порака на фонтаната, од Рајот извираат четири реки, неслучајно е истата тука поставена, вели Упевче.
Додаде дека на овој простор многу треба да се работи и на вегетацијата, да се оплемени просторот, каде во минатото имаше многу дрва, да се стави акцент и на хортикултурното уредување.
Повозрасните охриѓани овој простор го знаат како „Дуборезачка“, а помладите генерации, едноставно го знаат како плоштадот кај „Мини Маркет“.
Плоштадот е на површина од 970 м² и го красат две фонтани и мал амфитеатар. Поголемата фонтана е оплеменета со мозаикот на Упевче наречен „Четири рајски реки: Гион, Фисон, Тигар и Еуфрат“.
Никола Упевче е академски сликар, реставратор и конзерватор од Охрид. Како млад уметник и научен работник тој досега има оставено повеќе трајни траги во културно-историското наследство на Охрид, но и пошироко. (Крај)
извор: ИнПрес фото: ИнПрес
