Анкара, 28.октомври 2015 (ИНПРЕС) – Турското државно обвинителство покрена обвиненија против две деца, на возраст од 12 и 13 години, поради навреда кон претседателот на државата Реџеп Таип Ердоган, зашто го искинале постерот со неговиот лик, јавија денеска локалните медиуми.
Тоа е најнов случај малолетници да се изведуваат пред суд под слично обвинение, што повторно под лупа ја става проблематичната слобода на говор во Турција, пренесоа француските медиуми.
Државниот обвинител во најголемиот курдски град Дијарбакир за децата побарал затворски казни во траење меѓу 14 месеци и четири години и осум месеци, наведува весникот „Хуриет“.
Децата во мај биле фатени како на улица во Дијарбакир го кинат постерот со ликот на Ердоган. Двајцата се бранеле дека само сакале да го продадат постерот како стара хартија.
– Не обрнувавме внимание кој е на сликата, не знаеме кој е тоа – изјавило во судот помалото од двете деца.
Во декември минатата година едно 17-годишно момче беше уапсено во училница под обвинение дека го навредувал претседателот на државата и потоа во притвор бил задржан неколку дена, за на крајот да добие условна затворска казна од 11 месеци, што предизвика осуда од јавноста. (Крај)
извор:МИА фото:архива
