Годишнина од издавањето на Манифестот на АСНОМ на ГШ на НОВ и ПОМ
Црвена Вода, 3. октомври 2024 (ОХРИДПРЕС) – Во селото Црвена Вода, Општина Дебрца денеска се одбележаа 81 годинa од издавањето на Манифестот на АСНОМ на ГШ на НОВ и ПОМ.
Манифестот на АСНОМ по своето историско значење е еднаков на Крушевскиот манифест, бидејќи сите подоцнежни асномски одлуки се инспирирани од него, со што слободно може да се констира дека извориштето на современата македонска држава е во Дебрца, местото каде се испишани најсветлите страници од македонската историја.
– Со полагање свежо цвеќе на спомен обележјето, историски час, посета на Спомен собата на ГШ на НОВ и ПОМ и посета на Спомен собата од НОБ во село Белчишта одбележавме 81 година од издавањето на Манифестот на ГШ на НОВ и ПОМ, до македонскиот народ, на 3-ти октомври 1943 година, Ден кој е патронен празник на општина Дебрца. Во Дебрца се испишани најсветлите страници од македонската историја, а Манифестот до македонскиот народ, од 1943 година, по своето значење, е еднаков со Крушевскиот манифест од 1903 година и во него е претставена платформата на македонската државност, односно Асномска Македонија. Како генерација имаме обврска, но и аманет од нашите претци да се однесуваме одговорно кон нашата историја и нејзините придобивки. Затоа и во наредниот период посветено ќе работиме да се сочува интегритетот на Дебрца, нејзината епска димензија и еколошка иднина, порача градоначалникот на општината Зоран Ногачески.
Во Црвена Вода и на Славеј Планина пред 81 годинa беше формирана првата регуларна воена единица, баталјонот „Мирче Ацев“. Во селото Сливово беше формирана Првата Македонска-Косовска ударна бригада, со што Дебрца стана првата слободна територија во НОБ, а во селото Издеглавје, во 1944 година беше возобновена Македонската Православна Црква, во ликот на Охридската Архиепископија. (Крај)
извор: ОхридПрес фото: Општина Дебрца
