Спасовски: Денот на полицијата го одбележуваме заеднички со граѓаните во недела во Охрид

Скопје/Охрид, 5. мај 2023 (ИНПРЕС) – Денот на полицијата, 7-ми Мај го одбележуваме заеднички со граѓаните, во недела во Охрид, изјави министерот за внатрешни работи Оливер Спасовски.

Свечената прослава на празникот ќе се одржи во Охрид на сцената на Долни Сарај со почеток од 18:00 часот.

– Денот на полицијата го одбележуваме заеднички со граѓаните, согласно нашето мото – Полицијата во служба на граѓаните – кое последниве неколку години со засилена динамика го преточуваме во практика, па овојпат ја имаме честа да бидеме меѓу охриѓани, како наши домаќини. И, второ, сѐ повеќе гости од наши пријателски и партнерски земји ни укажуваат чест на овој ден, па таа меѓународна димензија на овој настан уште повеќе ја нагласува свеченоста на Денот на нашата полиција, изјави Спасовски.

На гостувањето на МРТ, Спасовски истакна дека оваа година 7-ми Мај е дополнително значаен бидејќи Република Македонија и Министерството за внатрешни работи се домаќини и на јубилејната 50-та Европска регионална конференција на ИНТЕРПОЛ, што се совпаѓа со уште еден јубилеј, 30-годишнината од членувањето на нашата држава во ова глобално полициско семејство.

Од 8-ми до 10-ти мај во Охрид ќе присуствуваат 123 високи делегати, со присуство на претседателот, генералниот секретар и извршниот комитет на ИНТЕРПОЛ, министри, директори на полиции и други високи гости. (Крај)

извор: ИнПрес фото: архива