Светски ден на занаетчиството, ракотворци од Охрид и Струга ќе ги претстават делата на посебна изложба

Струга/Охрид, 15. октомври 2024 (ОХРИДПРЕС) – Со изложба на рачни изработки и работилница за накит денеска во Струга ќе се одбележи 15-ти октомври, Светскиот ден на занаетчиството.

Настанот е во организација на националното здружение „Пинкокрафтс“, во соработка со Националната установа музеј „Д-р. Никола Незлобински“.

Сара Матоска од „Пинокрафтс“ за МИА информира дека седуммина изложувачи ќе ги претстават своите ракотворби и во живо ќе презентираат како ги изработуваат своите дела.

– Учество ќе заземат ракотворци од Струга и Охрид, кои ќе се претстават со свои дела и изработки, а секој посетител ќе може одблиску да се запознае со процесот на изработка, изјави Матоска.

Покрај Матоска со своите изработки од волна и филигран, на изложбата ќе учествуваат Biljana’s handmade jewelry со сутаж накит, Dijana handmade jewelry со накит од монистра, Elle’s accessories со плетени изработки, Copper art со слики од бакар, Копаничарска работилница Житие со дрворез и Александар Менкиноски ќе се претстави со свои авторски фотографии.

Изложбата ќе се одржи во спомен домот на браќата Миладиновци во Струга. (Крај)

извор: МИА фото: ОхридПрес