Минатата недела во Охрид регистрирани 45 заболени од грип, доминираат помладите на возраст од 5 до 14 години

Охрид, 24. јануари 2025 (ИНПРЕС) – Во третата недела од годинава во Охрид се регистрирани 45 нови случаи на заболени од грип.

Специјалист епидемиолог д-р Јованка Стурлакова Коровешоска од Центарот за јавно здравје Охрид за Супер радио и InPress вели дека ако неделата претходно најголем дел од заболените беа во возрасната група од 15 до 64 години, сега доминираат помладите на возраст од 5 до 14 години.

– За разлика од претходната недела сега поголем дел од заболените се од помладата популација. Во возрасната група од 5 до 14 години имаме 27 заболени, додека 18 се на возраст од 15 до 64 години. Моментално циркулира Инфлуенца тип A и Инфлуенца тип B, потенцира д-р Стурлакова Коровешоска.

Потенцира дека години наназад кај популацијата на возраст над 65 години е многу мал бројот на заболени од грип, а тоа се должи на тоа што се имунизираат. Тие и да заболат развиваат лесна клиничка слика.

Што се однесува до претходни сезони во овој период, сега бројот на заболени е многу помал.

Со оглед на почетокот на второто полугодие од учебната година се очекува периодов да има зголемување на бројката на заболени и вирусот да го достигне пикот.

На државно ниво, според податоците од Институтот за јавно здравје (ИЈЗ) во третата недела од годинава, од 13-ти до 19-ти јануари се регистрирани 1.412 случаи на заболени од грип, што е за 34,1% повеќе во однос на втората недела. (Крај)

извор: ИнПрес фото: архива