Скопје, 10. февруари 2025 (ОХРИДПРЕС) – Заедницата на единиците на локална самоуправа (ЗЕЛС) едногласно ја усвои иницијативата предложена од Општина Центар за меѓуинституционална соработка и воведување општокорисна работа за малолетни сторители на вандализам.
– Вандализмот зема замав во сите општини и е сериозен проблем што бара итна реакција. Малолетните сторители мора да се соочат со соодветни мерки, а одговорноста ја делат и нивните родители, истакна градоначалникот Горан Герасимовски.
Иницијативата предвидува измени на Законот за прекршочна постапка, Законот за пробација и Законот за правда за децата, со цел воведување општокорисна работа како мерка која ќе спречи вандализам и ќе придонесе кон ресоцијализација на малолетниците.
Дополнително, се предлага и разгледување измени во Законот за семејство и Законот за извршување на санкции, за да се обезбеди правна рамка која ќе ја вклучи и одговорноста на родителите преку заедничка општокорисна работа.
За спроведување на иницијативата ќе се формира стручна работна група составена од Владата, ресорните министерства, центрите за социјална работа, училиштата и невладините организации. Целта е да се креираат ефикасни законски решенија и да се спречат потешки последици од ваквите негативни појави, соопшти Општина Центар.
Ни Охрид не е поштеден од вандализмот. Искршени клупи, канделабри, уништена урбана опрема… Ова е честа слика и само дел од разултатите од демострирањето на „културата“ на однесување на дело и грижа за добрата.
Кога нешто недостасува, се критикува зошто го нема, а кога ќе го имаме не знаеме да го чуваме. Да се надеваме дека сторителите на вакви дела ќе бидат пронаоѓани и соодветно санкционирани. (Крај)
извор: Макфакс/ИнПрес фото: ИнПрес
