Скопје, 12. февруари 2025 (ИНПРЕС) – Министерството за локална самоуправа го објави јавниот повик за изразување на интерес од страна на општините за финансирање на инфраструктурни проекти од Потпрограмата АА.

Ова е втор повик за финансиска поддршка на општините за реализација на капитални инфраструктурни проекти. Сега на
располагање на општините ќе им бидат ставени 15 милијарди денари, а одобрените средства од централниот буџет не мора да бидат потрошени во тековната фискална година.

– Предмет на овој јавен повик е изразување на интерес за доделување на средства за финансирање на инфраструктурни проекти од Потпрограмата АА и поднесување на предлог – проекти, врз основа на претходно утврдени критериуми и процедури на Министерството за транспорт, Министерството за животна средина и просторно планирање, Министерството за образование и наука, Министерството за социјална политика, демографија и млади, Министерството за спорт и Министерството за култура и туризам, објавени на нивните веб-страни. Целта на овој отворен јавен повик е да се доделат средства на општините за проекти со чија реализација ќе се придонесе за унапредување на инфраструктурата на локално ниво со директен импакт врз зголемување на економскиот раст, развојот и зголемување на квалитетот на животот на граѓаните, стои во повикот.
Општините апликативните формулари и комплетната проектна документација за јавниот повик може да ги поднесат најдоцна до 30 април 2025 година.

Општина Охрид на првиот објавен повик аплицираше со 10 проекти и сите беа одобрени, а се од областа на животната средина и просторното планирање. Оттаму информираат дека истите се во финална фаза пред отпочнување со реализација.

Десетте општински проекти што се одобрени се:

– Реконструкција на улица во село Пештани;
– Реконструкција на улица во село Подмоље;
– Реконструкција на улица во село Долно Лекочереј;
– Реконструкција на водоводна линија на улицата „Кленоец“, ЛТХ „Леарница“;
– Реконструкција на пешачки улици во рамките на Градските гробишта во Охрид;
– Реконструкција на локален пат од крстосница за село Рамне до црквата „Свети Атанасиј“;
– Проект за замена на постоечка опрема во пумпна станица „Метропол“;
– Реконструкција на атмосферска и фекална канализациона мрежа за дел од улицата „Кленоец“;
– Реконструкција на улица во село Опеница која води до црквата „Свети Кузман и Дамјан“ и
– Рехабилитација на дел од локален пат за село Куратица.

Од општината за вториот повик најавија дека меѓудругото, ќе се бараат средства за проектот за Свињишки извори. (Крај)

извор: ИнПрес фото: ИнПрес