Охрид, 26. март 2025 (ИНПРЕС) – Утре во попладневните часови на охридскиот аеродорм „Св. Апостол Павле“ ќе пристигне првиот авион на компанијата Turkish Airlines на летот од Истанбул до Охрид.

На свеченоста ќе присуствуваат главниот извршен директор на ТАВ Аеродроми Серкан Каптан, главниот извршен директор на Turkish Airlines Билал Екси, турскиот амбасадор во земјава Фатих Улусој, македонскиот премиер Христијан Мицкоски и министерот за транспорт Александар Николоски.

Според најавите на оваа релација ќе се лета четири пати неделно, во понеделник, четврток, петок и недела, со летала од типот Ербас А321, Боинг 737-800 и Б737-900.

Превозникот претходно аплицираше и доби државни субвенции за стартување на услугата.

Во описот за Охрид на Turkish Airlines при промоцијата на директната авиолинија е наведено дека е популарна туристичка дестинација на Балканот, македонски бисер и дел од светското културно наследство на УНЕСКО.

– Познат по Охридското Езеро, Охрид поседува и историска текстура која го спојува неговото античко културно наследство со современи елементи, пишува на веб страната на Turkish Airlines.

Покрај тоа наведени се најатрактивните места за посета, дел од храната што треба да се проба, како и сервисни информации за градот.

Гостите од Турција традиционално се најбројни меѓу странските туристи во нашата држава, а тоа го потврдуваат и податоците на Државниот завод за статистика за бројките на туристи на месечно ниво. (Крај)

извор: ИнПрес фото: архива