Охрид, 5. ноември 2025 (ИНПРЕС) – По минатонеделната премиера, претставата „Парите се отепувачка“ од Ристо Крле, во адаптација и режија на Андреј Цветановски вечерва е на репертоарот на Народен театар Охрид.
Во претставата играат актерите: Стрезо Стаматовски во улогата на Митре, Филип Кипровски е Анѓеле, Марија Новак е Мара, Адријана Билаловиќ – Тодороска е Ката, а Никола Тодороски ќе го игра Софре.
„Парите се отепувачка“ е битово-социјална драма со мотиви од печалбарскиот живот. Темата е животот и трагедијата на едно македонско сиромашно семејство кое е принудено да го испрати својот единствен син на печалба, а идејата е јасно изразена во насловот – проклетството на парите. Дејството се случува во дваесеттите години на XX век, некаде во Западна Македонија.
– Парите се отепувачка спаѓа во класиците на македонската драматургија и како таква секогаш е подложна за нови сценски прочити. А тоа е можно затоа што темата е секогаш универзална : Која е жртвата што ја прави оној што оди на печалба, но и која е жртвата на семејството кое останува и чека печалбарот да се врати? Дали вреди животот да се стави на пауза заради соништата на семејството? Дали изгубеното време се надоместува со било кои пари? Низ овие поставени прашања се обидовме да направиме античка трагедија низ македонскиот мелос од битовата драма на Ристо Крле, вели режисерот Цветановски. Ова за него е петта премиера со oхридскиот народен театар. Впречем, Цветаноски беше режисер на првата претстава „Метаморфози“ што охридскиот театар ја изведе во 2011 година како Национална установа во рамки на Центарот за култура.
Почетокот на претставата е во 20:00 часот. (Крај)
извор: ИнПрес фото: архива
