Охрид, 8. октомври 2025 (ИНПРЕС) – Во тек е пријавувањето за бесплатна вакцинација против сезонски грип на ризичните групи граѓани.
Опфатени се повозрасните лица над 65 години, лица со хронични заболувања, здравствени работници, бремени жени, деца на возраст од 6 месеци до 5 години, како и лицата сместени во установи за социјална заштита на стари лица и вработените во овие установи.
Заинтересираните може да се пријават електронски на порталот vakcinacija.mk со пополнување на пријавата или преку својот матичен лекар.
Од охридскиот Центар за јавно здравје за Супер радио и InPress велат дека сѐ уште не знаат колку дози ќе добијат, со оглед на тоа што вакцината треба да ги помине задолжителните анализи, а имаат најави дека со имунизација ќе се започне во втората половина на месецов. Додаваат дека граѓани веќе се информираат кај нив и си закажуваат термин.
Министерството за здравство годинава набави 80.000 дози четиривалентна вакцина од реномираниот производител „Абот“ од Холандија. Министерот Азир Алиу вели дека интересот на граѓаните за бесплатната вакцинација против сезонски грип секоја година е сѐ поголем, што покажува зголемена свесност за значењето за заштита од грип и уште еднаш ја потврдува важноста и потребата од оваа превентивна мерка. (Крај)
извор: ИнПрес фото: архива
