Охрид, 21. август 2025 (ИНПРЕС) – Продолжува координацијата на активностите за реализација на проектот за изградба на автопатот Кичево-Охрид со цел запазување на роковите, вели директорот на Јавното претпријатие за државни патишта Коце Трајановски.
По состанокот со изведувачите и надзорот, како и по увидот долж трасата заклучено е дека се работи на сите предвидени точки, со цел што побрзо да се созададат услови за ставање во функција на уште еден дел од трасата и тоа на потегот од Климештани до Охрид.
– Се асфалтира на главната траса, како и на пристапните патишта со цел да им се овозможи на локалните жители брз, лесен и безбеден пристап до нивните домови што се околу автопатот во изградба. Mинатата недела беше ставен под времен режим на сообраќај натпатникот кој е дел од патниот јазол Подмоље. Со тоа дополнително се созададоа услови за доизградба на десната коловозна лента од автопатот во зоната на патниот јазол, но и услови за изградба на рампа 1 која води од правец Струга кон Охрид и рампа 4 која води во правец од Кичево кон Охрид. Јавното претпријатие за државни патишта очекува нивната изградба да се одвива брзо со што би напреднале работите за доизградба на клучката Подмоље, информира Трајановски.
Додава дека отпочнато е со асфалтирање и на паралелниот пристапен пат Требеништа-Подмоље-Охрид, кон населените места Горенци и Оровник и завршено е бетонирањето на потпатникот на делница 4 на 10 + 800 км меѓу Мешеишта и Требеништа.
– Со несмалено темпо се работи и на клучката Св. Еразмо, а во средишниот појас се поставува еластична одбојна ограда, додека во Требеништа се работи на потпатникот каде се прават потпорни ѕидови и интензивно работиме и на решавањето на приклучувањето на безниските пумпи.
Од почетокот на јули граѓаните, туристите и сите оние кои патуваат кон Охрид, возат по автопат од Врбјани до Ботун и по нов асфалт од Климештани до Охрид, вели Трајановски.
Очекувањата се наскоро да биде ставена во функција уште една делница со автопатско решение од Климештани до Охрид. (Крај)
извор: ИнПрес фото: архива
