Охрид, 18. август 2025 (ИНПРЕС) – По повод одбележувањето на јубилејот 80 години Црвен крст Охрид, а во рамки на овогодинашното издание на Ohrid Water Festival, ќе се одржи штафетно нуркање за мир (пливање под вода-нуркање на здив).
Ќе се одржи на 25-ти август (понеделник) со почеток во 12:00 часот. Трасата ќе биде во должина од 25 метри кај старото пристаниште, пред хотел „Палас“. При штафетното нуркање на здив можат да се користат и помагала (маска, пераи и сл.).
– Ги покануваме сите оние кои се психофизички здрави и се чувствуваат способни за учество на овој, единствен настан од ваков вид во светот, со што од Охрид, Балканскиот Ерусалим, заеднички ќе испратиме силна порака за мир, почитување и толеранција.Сите заинтересирани од 8-88 годишна возраст можат да се пријават во просториите на Црвен крст Охрид на ул. „Димитар Влахов“ бр. 52 (спроти Гимназија), на телефоните 046 261-909 и 070 315-309 и на е-маил ohrid@redcross.org.mk, најдоцна до 23.08.2025 година, информираат од Црвен крст Охрид.
Настанот ќе се реализира на посебно подготвена и обележана патека, а како специјален гостин се очекува човекот „амфибија“, 71 годишниот Јане Петков од Сандански, Бугарија, кој своето учество во оваа подводна штафета за мир ќе го направи со нуркање на 25 метри со една рака врзана за телото.
Од организацијата се надеваат дека овој настан ќе биде инспирација и мотивација за младите и возрасните со спортски дела да се промовираат здравите животни навики и да бидат гласот на разумот. (Крај)
извор: ИнПрес фото: архива
