Охрид, 4. февруари 2026 (ИНПРЕС) – Неодамнешните врнежи од дожд предизвикаа одрон на дел од ѕидот кај археолошкиот локалитет „Манчевци“ во стариот дел на градот.
Директорот на охридскиот Завод и Музеј, Горан Патчев, за Супер радио и InPress вели дека нивна екипа ја санира состојбата. Ископот пак направен кај локалитетот е согласно одобрение за археолошки истражувања и во тек е преземање на мерки за тука да се направи потпорен ѕид.
Патчев додава дека биле во контакт биле со сопствениците за заеднички да се реши проблемот, а известено било и министерство за култура и туризам на Република Македонија.
Локалитет „Манчевци“, како туристичка атракција во Охрид, е делумно истражен во текот на 2007 година при што се отстранети два објекти. По извршените археолошки ископувања на овој археолошки локалитет во старото градско јадро на Охрид, констатирана е ранохристијанска базилика од која се откриени делови од северниот и централниот кораб, кога се истражени околу 200 м². Локалитетот се наоѓа во близина на катедралната црква Света Софија, на потегот кон Античкиот театар, во густо населен дел на стариот град и најверојатно се протега и под околните куќи.
Базиликата, која е една од деветте во градот и потекнува од периодот на IV-V век од нашата ера, има прилично зачуван поден мозаик со декоративен аранжман што бил карактеристичен за IV и V век. Како особено значајно се издвојува мозаичното поле со донаторски натпис во кој се спомнуваат Тома и Јован кои веројатно го изградиле објектот. Исто така, беа откриени фрагменти од фреско-живопис во долните партии на ѕидовите. Во текот на археолошките ископувања откриени се и мошне значајни елементи и фрагменти од мермерна градежна и декоративна пластика.
Проектотот за конзервација и презентација на откриените структури од базиликата, на локалитетот се одвиваше во континуитет неколку година по ред, а реализацијата на планираните активности ја спроведуваше НУ Завод за заштита на спомениците на културата и Музеј – Охрид. При конзервацијата се користеа автентични материјали, водејќи сметка за опусот на ѕидаријата. (Крај)
извор: ИнПрес фото: ИнПрес
