Охрид, 29. мај 2025 (ИНПРЕС) – Ученичката заедница при СОСУ „Св.Кирил и Методиј“ од Охрид, изработи видео за ретката болест Спинална мускулна атрофија.
Во знак на благодарност училиштето го посети м-р Симона Јовеска-претседател на здружението СТОП СМА, д-р Маја Божиновска-Смическа- невролог, Гордана Лолеска-претседател на здружението „Ретко е да си редок“ и Сафет Алили, претставник на здружението LETZCare a.s.b.l – Luxemburg.
– Средбата беше остварена на иницијатива на здружението СТОП СМА кои беа особено воодушевени од трудот на нашите ученици. Тие изразија желба да се запознаат со “главните виновници” за изработка на оваа видео коешто беше прикажано и на Медицинскиот факултет во Скопје. На оваа средба учениците од здравствена струка одржаа кратка презентација за ова ретко заболување и поставуваа прашања до гостите за предизвиците со коишто се соочуваат во секојдневниот живот. Гостите направија и обиколка на нашето училиште и изразија огромно задоволство од просторните услови на училиштето, информираат од училиштето.
На иницијатива на претставникот на здружението LETZCare a.s.b.l – Luxemburg Алили на училиштето му беше донирана мобилна пристапна рампа и лупа за читање што се од особена важност со цел подобра пристапност на целото училиште и олеснување на следење на наставата кај лицата со оштетен вид. (Крај)
извор: ИнПрес фото: СОСУ „Св.Кирил и Методиј“
