Охрид, 23. јуни 2025 (ИНПРЕС) – Уникатно доживување за публиката со впечатливи изведби, поздравени со долги аплаузи и овации приредија учесните на седмиот по ред Меѓународен хорски фестивал „Гласот на Охрид“, организиран од градскиот мешан хор Вокс Лихнидос.

Хорските ансамбли уште еднаш докажаа дека музиката не познава граници и дека и ако не разбираме некој збор, ја доживуваме нотата, секој на свој начин.

Диригентот на охридскиот хор м-р Бурим Хидри повеќе од задоволен од нивниот настап како домаќини, но и одличното претставување на гостинските хорови. Во црквата „Св.Софија“ присутните уживаа во настапите на „Атендите“ од Кикинда – диригент д-р. Билјана Јеремиќ, машкиот вокален ансамбл „Канон“ од Крагуевац предводен од проф. Ѓорѓе Цатиќ, „EduCantus“ од Ниш – диригент м-р. Мила Пужиќ, хорот на Средното музичко училиште „Пренк Јакова“, од Ѓаково, предводен од м-р. Кастриот Сада. Од Македонија настапија женскиот младински хор при МКЦ и мешаниот хор „Драган Шуплевски“ од Скопје, под диригентската палка на м-р. Сашо Татарчевски. Фестивалот го отвори младиот Александар Гавриловски на пијано.

– И оваа година на фестивалот понудивме хорски композиции од различни музички жанрови, од класична музика до современи аранжмани. Голема  благодарност за поддршката упатуваме до Министерство за култура и туризам, Македонска Православна Црква – Охридска Архиепископија и Општина Охрид. Нашиот репертоар беше специјално подготвен за фестивалот. На особено задоволство премиерно во Македонија ја изведовме композицијата „Бум та ка бум“ посветена на хорот, од македонскиот композитор Гоце Гавриловски. Со оваа композиција се натпреварувавме на фестивал во Ниш, каде добивме Повелба за негување и унапредување на македонската хорска музика, истакна Хидри за Супер радио и InPress.

Со ова хорот Vox Lychnidos заокружи уште една хорска сезона, вткаена во повеќегодишната успешна хорска приказна, со бројни настапи низ Македонија, но и надвор. (Крај)

извор: ИнПрес фото: ИнПрес