ЗАСТРАШУВАЧКА ПОРАКА: Исламисти му се заканија на Балканот и на Македонија

Белград, 15.јули 2015 (ИНПРЕС) – Ние сме исламски халифат, радувај се Македонијо, доаѓа шеријатот, стои во дел од застрашувачката видеопорака што се појави на Јутјуб, а на која наводна исламска организација се заканува со освојување на целиот Балкан со колеж и убиства.

Во пораката, насловена „Ние сме исламски халифат – касида“, Србија од страна на исламските терористи е означена како почетна мета, односно како центар на Балканот кој треба прв да го освојат.
По Србија, на метата на исламистите се наоѓаат и другите земји на Балканот, односно Хрватска, Црна Гора, како и Македонија. Исламистите наводно планираат покорување и на Албанија, Босна и Херцеговина, како и на Косово, како би создале своевидна балканска варијатна на ИСИЛ.

„Радувајте се Балканци, се наближуваат подобри денови, ви доаѓаат муслимани, ние сме исламски халифат“, гласи првата строфа од пораката испратена како верско пеење.

За Србија се вели „Радувај се Србијо, ќе бидеш дел од исламот иако тоа не ти се допаѓа, ние сме исламски халифат“, стои во стиховите за Србија.

Македонија, пак, е ставена во група со Албанија и со Косово. „Радувајте се Албанијо, Косово и Македонијо, ќе ви го вратиме шеријатот, ние сме исламски халифат“.

Сепак, видеопораката е само една од многуте што пропагандата на ИСИЛ ги шири низ светот. Во земјите на Балканот и во ЕУ се засилени мерките за безбедност на сите нивоа, особено откако во Франција се случи исламистичкиот напад во кој загинаа цивили.

Засилени мерки за безбедност имаше и на фестивалот „Егзит“ во Нови Сад, кој се одржа минатиот викенд, а како превентива за евентуални терористички напади.(Крај)

извор:Телеграф фото:архива