Охрид, 23. март 2023 (ИНПРЕС) – Денес се одбележува Светскиот ден на метеорологијата, а свеченоста годинава ќе се одржи во метеоролошката станица во Берово под мотото „Иднината на времето, климата и водата низ генерациите“.

По повод денешниот ден во продолжение ќе изнесеме неколку факти поврзани со метеоролошките мерења во Охрид.

Метео станицата во Охрид има долг историјат на мерење што датира од 1923 година како дождомерна станица и од 1945 година на денешната локација, до ОУ „Св.Климент Охридски“, како главна станица. Во историската архива се документирани сите метеоролошки податоци. Па така рекордно највисока температура на воздухот во Охрид од 37,5 степени е измерена во јуни 2007, во јануари 1954 најниската температура била -17,2 во Охрид за еден ден може да наврнат над 90мм дожд, а имало и години кога 78 последователни денови немало капка дожд.

Минатата година на свеченоста по повод денешниот ден беше откриена скулптурата „Весна“, дело на Даниела Илијоска, раководтел на Главната метеоролошка станица во Охрид. Ја симболизира старословенската божица на пролетта, а направена е од 1891 шишарка, односно годината од кога почнало мерењето на температурата на воздухот во Македонија. (Крај)

извор: ИнПрес фото: ИнПрес