Куманово/Приштина, 28. мај 2015 (ИНПРЕС) – Извор од Косовската разузнавачка агенција тврди дека косовската претседателка Атифете Јахјага и премиерот Иса Мустафа биле информирани за можноста за инцидент во Куманово, пишува денеска приштинскиот весник Коха.

Изворите велат дека агенцијата пресретнала разговори меѓу група граѓани на Косово и Македонија, кои биле скриени во пет куќи поврзани со тунели во Куманово, од кои се гледа дека тие сакале да ја заживеат албанската Ослободителна народна армија, вели Новости.

Коха пишува дека 70 отсто од населението биле евакуирани во текот на ноќта кога почнале борбите и додава дека само четворица осомничени знаеле дека ова е направено според однапред договорено сценарио.

Планот на водачите бил да ги повикаат некои од членовите на групата во Куманово на состанок на штабот и потоа да ѝ ги предадат на полицијата, но овие отвориле оган врз полицајците и ситуацијата излегла од контрола, пишува Коха.

Весникот Зери пишува дека Комитетот за внатрешни работи и безбедност на Собранието на Косово го повикал премиерот Мустафа да поднесе извештај за сознанијата што ги имал во врска со инцидентот во Куманово. (Крај)

извор: mkd.mk фото: архива