Промоција на „DARE“, прв македонски дневник што се фокусира на телесната дисморфија, автор е охриѓанката Емилија Наумоска

Охрид, 22. февруари 2023 (ИНПРЕС) – Во недела, 26-ти февруари, во кафе барот „Shilla“ ќе се одржи промоција на „DARE“, 6-месечен дневник што ја разработува телесната дисморфија и се фокусира на моменталните чувства за нашето тело.

Автор е охриѓанката Емилија Наумоска. Во краткиот разговор за Супер радио и InPress, во пресрет на промоцијата, таа вели дека акцентот е ставен на тоа како денес се чувствуваш и што денес направи за твоето тело, бидејќи нема поважен ден од денес.

– Исто така разработени се 6 теми како исхрана, физичка активност, партнерски врски, самоограничувања, социјални мрежи и социјална анксиозност – сите тие теми се поврзани со телесната дисморфија и има совети од лично искуство истите да ги подобриш. На пример, како социјалните мрежи влијаат врз твојата слика за телото, вели Наумоска.

Додава дека идејата да напише ваков дневник произлегла од лично искуство.

– Повеќето луѓе се справуваат со телесна дисморфија зад затворени врати, а истата знае да има влијание во различни ситуациии во животот. Мојата негативна слика за моето тело ми создаваше социјална анксиозност и лоша врска со храна и физичката активност. Едноставно, негативната слика за моето тело ме спречуваше да го живеам животот како што сакам, бидејќи се фокусирав да го сменам за да биде прифатено во социјалните стандарди за убавина, а со тоа, повеќе ќе бев прифатена јас. Сé почнуваше и завршуваше со моето тело. Строги диети пред лето, широка облека, срамежливост, ниска самодоверба, нездрави врски со луѓе и многу други работи. Но, овој тежок период го поминав сама и баш тогаш научив што значи да го цениш и сакаш своето тело и да се грижиш за него, а не да се „грижиш” за тоа како другите го гледаат. Па, оттука дојде идејата да се направи производ што ќе им помогне на сите да се справат со ваков тип на негативни навики и чувства, потенцира Наумоска.

На самата промоција, што ќе започне во 18:00 часот, дневникот DARE ќе се продава по промотивна цена од 599 денари. (Крај)

извор: ОхридПрес фото: архива