Охрид, 29. јануари 2025 (ИНПРЕС) – Во втората половина од јануари е забележливо намалување на нивото на водата во Охридското Езеро, што и онака е под просекот за овој период од годината.
Според денешните мерења нивото е на кота од 693,20 м.н.в што е за 15 сантиметри под просечното ниво за овој месец (693,35 м.н.в) и 10 сантиметри над минимално дозволената кота (693,10 м.н.в). Температурата на езерската вода, измерена утрово е 9,0 степени и е за 2,2 степени повисока од просечната.
Во првата половина од јануари се бележеше минимален раст на водостојот, но во втората половина константно е во пад. Последнава недела нивото е намалено за три сантиметри.
Во Охрид денес променливо облачно време со услови за повремени локални врнежи од дожд кон крајот на денот. Ќе дува умерен ветер од јужен правец. Максималната температура ќе се искачи до 7. степени.
– Денеска и во текот на ноќта кон четврток особено во западните делови ќе има врнежи од дожд кои најпрвин во западните делови ќе бидат наместа поројни. Во четврток наместа и претежно на југот и југоистокот ќе има врнежи кои краткотрајно ќе бидат поројни проследени со ретки грмежи. Во петок и сабота ќе биде стабилно, а од недела повторно се очекуваат врнежи, информираат од Управата за хидрометеоролошки работи на Република Македонија (УХМР). (Крај)
извор: ИнПрес фото: ИнПрес/УХМР
