Охрид, 11. април 2023 (ИНПРЕС) – Повеќе од еден месец кандидатите кои завршиле со обука за возачи не можат да полагаат возачки испит.

Причината е што на постоечкиот испитен центар му е истечена лиценцата, а вчера е објавен нов конкурс за избор, откако претходниот не бил успешен.

Работата застана, кандидатите не доаѓаат да завршат со часови додека нема комисија, многу малку се запишуваат нови. На нас како авто школи ни криви ни должни, немањето лиценца за испитен центар во Охрид ни се одрази на работата, вели за Супер радио и InPress Бети Ѓоргиевска, сопственик и инструктор во авто школата „Ролекс“ од Охрид.

– Од почетокот на март, еве веќе повеќе од еден месец кандидатите кои завршиле со обука не можат да полагаат за возачки испит. Објавен е нов конкурс, административно до каде ќе оди постапката не можам точно да проценам, но според мене ќе помине уште толку додека завршат постапките за добивање лиценца. Секако дека ова влијае на обемот на нашата работа, потенцира Ѓоргиевска.

И покрај ваквата ситуација, Ѓоргиевска препорачува и ги повикува сите оние кои се заинтересирани, да си го почнат процесот на обука, надевајќи се дека лиценцата ќе биде одобрена во некое нормално време, штом ја завршат обуката ќе излезат на испит. Во секој случај да си почнат со обука и да го искористата овој период кога нема многу гужва.

Министерството за внатрешни работи вчера го објави јавниот конкурс за избор на правно лице за добивање лиценца за испитен центар Охрид, кој трае 15 дена и во кој се наведени условите што треба да ги исполнуваат фирмите што ќе учествуваат. (Крај)

извор: ИнПрес фото: архива