Охрид, 9. февруари 2026 (ИНПРЕС) – Ќе се поставуваат информативни табли на најкритичните локации низ Охрид во борбата со дивите депонии и опасностите за здравјето на граѓаните.
– Запомнете, ресурсите, особено финансиски што се трошат за повторно и повторно подигање на нелегално одложен отпад може да се искористат за унапредување на услугите што како претпријатие ги нудиме. Затоа, доколку имате отпад за одлагање ве молиме контактирајте нѐ на 075 495 428, посочуваат од ЈП „Охридски комуналец“.
За дивите депонии што никнуваат насекаде сме пишувале многупати, но свеста и културата на однесување и понатаму ни се на ниско ниво, како да важи она не можете да расчистите толку ѓубре колку што можеме да создадеме, како да постои натпревар во одлагање отпад на несоодветно место.
Од ЈП „Охридски комуналец“ неодамна за Супер радио и InPress информираа дека во текот на минатата година подигнале 5.314 m³ најразличен отпад од диви депонии создадени од несовесни поединци, а локациите на кои никнувале диви депонии се „распослани“ низ целото градско подрачје.
Како решение за овој хроничен проблем ја посочија потребата од воведување на комунална полиција. Ваква служба постои во градовите од соседството како Белград, Тирана, Подгорица и дава позитивни резултати во неколкукратно намалување на нечистотијата. (Крај)
извор: ИнПрес фото: архива
