Охрид, 16. декември 2025 (ИНПРЕС) – Прв медал во сениори во историјата на Македонската Традиционална Таеквон-до Федерација од Светски куп.
Викендов МТТФ со тројца натпреварувачи под водство на националниот тренер Саша Поповски, потпретседателот Зоран Парулески и Христијана Парулеска како судија, учествуваше на Светскиот куп „King of Taekwon-do“, што се одржа во Солун, Грција. Учествуваа над 1.400 натпреварувачи од 21 држава од целиот свет.
Најголемиот успех го постигна Владимир Димитриевиќ во спаринг категорија сениори до 78 кг. И покрај повредата здобиена поради густиот натпреварувачки распоред во изминатиот период, тој успеа да освои бронзен медал – прв медал за МТТФ од Светски куп. Во елиминационата фаза го совлада домашниот натпреварувач од Грција, а во четвртфиналето забележа победа над претставникот од Естонија. Во полуфиналниот меч беше поразен од натпреварувачот од Украина, со што не успеа да се пласира во финалето и борбата за златен медал.
Со овој резултат, Димитриевиќ ја заокружува 2025 година онака како што и ја започна – со историски успех во сениорска конкуренција. Овој медал претставува значаен чекор напред за МТТФ и македонското традиционално таеквон-до и е јасен показател дека ИТФ таеквон-до спортот се стреми да биде еден од најдобрите спортови во Македонија.
Миа Танеска настапи во категорија јуниори, црвен појас, форми (борба со замислен противник), во конкуренција од 38 натпреварувачки. Таа успеа да се пласира до четвртфиналето, каде што беше поразена во борбата за медал и влез во полуфинале, освојувајќи го високото 9-то место. Додека во спаринг категорија јуниори до +55 кг, и покрај прикажаната борбеност и квалитет, не успеа да ја совлада противничката и беше елиминирана во раната фаза.
На овој Светски куп настапи и Даниел Стојаноски, кој за првпат ја претставуваше МТТФ во категорија кадети до -40 кг, но ја загуби првата борба. (Крај)
извор: ИнПрес фото: МТТФ
