Охрид, 24. април 2026 (ИНПРЕС) – Во рамки на проектот „Заштита на пештерските екосистеми од влијанијата на климатските промени и воспоставување одржлив систем за одговор на катастрофи во НП „Галичица“ во тек е мониторинг на пештерата Лескоечка.
Воспоставениот редовен мониторинг преку фото-замки овозможува постојано следење на состојбата во екосистемот на Лескоечка Пештера. Куна белка (Martes foina) е нов евидентиран посетител во Лескоечка Пештера.
– Куна белка е средно голем предатор. Телото е тенко и долго 40 – 55 см, опашката долга 22 – 30 см, нозете се кратки, а тежината е 1 – 2,3 кг. Крзното е сиво-кафено, потемно на грбот, со карактеристична бела точка на грлото и градите. Главата е мала и зашилена, со големи тркалезни уши. Ноктите се силни и делумно свиткани. Куна белка е одличен качувач и тркач, може да трча до 15 км/час и да скока до 4 м. Се храни со мали глодари (глувци), зајаци, птици, птичји јајца, инсекти, овошје (јаболка, сливи, грозје), пченка. Не складира резерви на храна. Се пари во јули/август и по 8 – 9 месеци бременост, младите ги раѓа во март/април. Леглото обично има од 1 до 5 млади, просечно 3. Младенчињата се самостојни до есен, информираат од Црвен крст Охрид.
Додаваат дека Куна белка е многу прилагодлив вид – единствената куна што редовно ги населува човечките населби. Во Националниот парк „Галичица“ се забележува често. Живее осамен живот, а во пар е само за време на сезоната на парење. Активна е ноќе и одмара во шуплини на дрвја, густи грмушки или напуштени гнезда на птици и верверички.
Проектот „Заштита на пештерските екосистеми од влијанијата на климатските промени и воспоставување одржлив систем за одговор на катастрофи во Националниот парк „Галичица“ е поддржај од Prespa Ohrid Nature Trust – PONT, а го спроведуваат Црвен крст Охрид и Истражувачко друштво „Урсус спелеос“ – Скопје во соработка со ЈУНП „Галичица“. (Крај)
извор: ИнПрес фото: Црвен крст Охрид/print screen
