Скопје, 11. август 2025 (ИНПРЕС) – За матурантите кои во јуни не ги положиле или не во целост двата екстерни испити од државната матура, во августовската испитна сесија ќе ги полагаат на утре, 12-ти и во четврток, 14-ти август.
Утре ќе биде тестирањето по мајчин јазик (македонски, албански, турски, српски) и литература, а во четврток е полагањето на изборниот екстерен испит (математика, англиски јазик, француски јазик, германски јазик, руски јазик, италијански јазик, филозофија, естетика).
Според податоците на Државниот испитен центар (ДИЦ), за двата испитни дена вкупно се пријавени 1118 ученици. Од нив, 352 ќе полагаат македонски јазик, 225 – албански јазик, 9 – турски јазик. Англиски ќе полагаат 779, еден ученик ќе полага француски јазик, двајца – германски јазик, 27 – математика и еден матурант е пријавен да го полага испитот по естетика.
Според видот на образование, од гиманзиско ќе полагаат 265 ученици, средно стручно – 835 и 18 од средно уметничко образование. Испитите во августовскиот рок кандидатите ќе ги полагаат во простории на факултетите.
МОН и ДИЦ деновиве ги соопштија резултатите од спроведената државна матура во јуни. Просечната оценка на успехот од полагањето на двата екстерни испити во јунската сесија е 3.69 и е повисок од минатата година кога средната оценка беше 3.26. Поголем успех е забележан кај мајчините јазици и кај други предмети, а особено по математика за кој средната оценка е 4.14.
Пријавени за полагање во јунскиот рок беа 15.004 ученици. Поради обиди за препишување, употреба на електронски уреди и други неправилности, поништени биле тестовите на 172 ученици. (Крај)
извор: ИнПрес фото: архива
