Белград, 27.јули 2015 (ИНПРЕС) – Министерот за надворешни работи на Србија, Ивица Дачиќ испратил писмо до генералниот секретар на ОН Бан Ки-мун по повод барањата на Косово да стане членка на „УНЕСКО“, пишува денеска српскиот весник „Вечерње новости“.
Според Дачиќ за Србија тоа е неприфатливо, бидејќи Косово не може да се смета за држава.
Според зборовите на Дачиќ Србија сé уште не ја промени својата позиција во врска со „статусот на областа“, иако се соочува со барањата на Приштина да стане дел од меѓународните организации, надвор од контекстот на договорот за регионална соработка.
Во исто време е јасно дека Холандија нема да биде против членството на Косово во „УНЕСКО“. Тоа го изјавил холандскиот амбасадор во Србија, Лоран Луис Стоквис, цитиран денеска од српскиот весник „Блиц“.
Според зборовите на Стоквис, Холандија ја призна независноста на Косово и затоа нема ништо против членството на земјата во „УНЕСКО“. Тој, сепак истакнал дека не знае дали Косово ги исполнило критериумите за членство.(Крај)
извор:Плусинфо фото:архива
