Струга, 19. декември 2025 (ИНПРЕС) – Во тек е главниот дел од легендарната трка „Светски предизвик на Атлантикот“, а стружанецот Ердал Лушо и понатаму е на пат кон Зелено Р’тските острови и му преостануваат уште 280 наутички милји.
Во текот на трката тој мораше да го промени курост поради потребата од поправка на крмата која почнала да протекува, утврдил дека е свиткана оската на трим-таблата, па „Пиксел“ го управува рачно преку ден, а ноќе спие.
– Пред три ноќи слушнав многу непознат звук, додека дрифтував со влечните јажиња, отогаш не можев да држам прав курс, без разлика што и да правев. Се испостави дека нешто удрило и ми ја свиткало оската на трим-таблата. Поминаа 3 дена, управувам рачно преку ден, а спијам ноќе, остануваат уште 280 наутички милји. Треба да ја донесам најтешката одлука во мојот живот!, напиша утринава Ердал.
Вкупно 8 натпреварувачи кои ги поминаа елиминациите, меѓу кои и Лушо, пловат сами 40 дена во обид да го преминат Атлантикот, од Португалија до Карибите. Стружанецот Ердал Лушо ја финишира првата етапа на SAC-25, од Португалија до Канарските острови на третото место, со време од седум дена и 39 минути.
Напредокот можете да го следите ОВДЕ.
Супер радио и InPress ќе го следат неговиот подвиг, а на Ердал му посакуваме многу среќа и мирно море со толку ветер колку што е потребно за неговиот „Пиксел“ сигурно и брзо да стигне до Карибите. (Крај)
извор: ИнПрес фото: архива
