Охрид, 23. март 2026 (ИНПРЕС) – Традицијата продолжува – распишан е конкурсот за 33. издание на интернационалниот музички фестивал „Охрид фест – Охридски трубадури“, еден од најпрепознатливите музички настани во регионот.
Фестивалот ќе се одржи на 26-ти и 27-ми август, а организаторите повторно ги повикуваат сите креативци, изведувачи и автори да испратат свои нови композиции и да станат дел од сцената која со години создава музички приказни.
И годинава година акцентот е ставен на младите и новите имиња. Дебитантите имаат отворена врата да се претстават во рамки на двете фестивалски вечери – фолк и интернационалната поп вечер. Токму оваа комбинација на традицијата и модерното е она што го прави фестивалот уникатен.
Сите заинтересирани треба да испратат финално продуцирани композиции, со времетраење до три и пол минути, на официјалната e-mail адреса на фестивалот: ohridskifestival@gmail.com, со назнака за која вечер аплицираат.
Рокот за пријавување е до 15 јуни 2026 година.
Со децении наназад, фестивалот останува симбол на квалитет, емоција и музичка страст – сцена на која секоја песна има шанса да стане незаборавна. (Крај)
извор: ИнПрес фото: архива
